TONONKALON’I DadaRabe

                     TIAKO BE IANAO 

Tiako be ianao
Sy ny tontolonao
Ny momba anao rehetra,
Lalaiko ts’isy fetra !

Raha sendra lavitra ahy,
Ny foko dia manahy,
Ka lasanao daholo,
Ny saiko manontolo.

Tsy andriko intsony,
Izaho tsy mety tony,
Fa ny ho eo anilanao
No mamiko izao.

Ianao…ianao irery,
No ahiko tsy an-tery,
Ka tiako fa anjara…
Ianao…ry Gasikara.

DadaRabe Aix-en-Provence , 11/01/04

*************************************************************************************

IANAO NO MAHALALA

Ry hany tanindrazako ! tsy foiko sy malala !
Raha nandao anao aho, an-taona maro izay,
Tsy hoe ninia nikimpy na koa tsy nahalala
Ny ratra sy ny fery na ny ady mahamay
S’ireny fijaliana,
Ireny fahoriana,
Ireny fihafiana,
Izay nitomaniana.

Ry tany tiako indrindra, narary anie ny foko,
Raha sendra ny tsy fidy, ka ho any an-tsesitany;
K’ireny ranomaso, nilalotra toloko
Niniako nampanginina na hila tsy ho lany,
Fa mafy ny mitady
Manangana ny ho avy,
Fa ts’isy vavahady
Misokatra sahady.

Dia nifandimby teny ny andro sy ny volana,
Toa efa hody ventiny ny rano nantsakaina,
Kinanjo tsy nampoizina fa misy foana ny olana
Mitady hanembatsembana ilay maraina andraina:
Te hody aho na androany
Raha azo atao izany,
Fa saingy nofy ihany
Ny foko toa tomany !

Misy ny milaza fa efa nanadino anao ny foko tia,
Nolazainy koa fa efa natakaloko ny hafa hono ianao !
K’aleoko miampify, mandositraanao aty lavitr’aty,
Minia tsy mahatsiaro ary manadino, nahita vaovao !
Ry Madagasikara !
Ianao no mahalala
Ny foko anie tsy hiala
Fa tia toy ireny adala.

DadaRabe     http://www.freewebs.com/dadarabe 

Marseille 22/08/01    http://dadarabe.blaogy.com/